வைரமுத்து சொர்ணலிங்கத்திற்கு வாழ்நாள் சாதனையாளர் விருது !

தமிழ்க் கனடிய கலை மற்றும் இசைத்துறையில் 35 ஆண்டுகளுக்கும் மேலாக ஆற்றிவரும் தொடர்ச்சியான பணியைப் பாராட்டி, திரு. வைரமுத்து சொர்ணலிங்கம் அவர்களுக்கு 7ஆவது ரொறன்ரோ சர்வதேச தமிழ்த் திரைப்பட விழாவின் வாழ்நாள் சாதனையாளர் விருது – 2026 வழங்கப்பட்டது.

செப்டம்பர் 25 முதல் 27ஆம் திகதி வரை நடைபெற்ற இவ்விழாவின் நிறைவு நிகழ்வாக, செப்டம்பர் 27ஆம் திகதி ஸ்காபுறோவில் அமைந்துள்ள கிராண்ட் சின்னமன் விருந்து மற்றும் மாநாட்டு மண்டபத்தில் விருது வழங்கும் நிகழ்வு நடைபெற்றது.

கலை மற்றும் இசை நிகழ்வுகளுக்கு அவர் வழங்கிய நீண்டகால ஆதரவு, தமிழ்க் கனடிய கலைச் சமூகத்தின் வளர்ச்சியில் ஆற்றிய பங்களிப்பு மற்றும் பல ஆண்டுகளாகத் தொடர்ந்த கலைப்பணி ஆகியவற்றை அங்கீகரிக்கும் வகையில் இவ்விருது வழங்கப்பட்டது. விருதுடன் நினைவுக் கோப்பையும் சான்றிதழும் வழங்கப்பட்டன.

அவரது கலைப் பயணம் மேடையில் நினைவுகூரப்பட்டதைத் தொடர்ந்து, விருது வழங்கப்பட்ட தருணத்தில் அரங்கில் இருந்தவர்கள் எழுந்து நின்று மரியாதை செலுத்தினர். விழாவின் குறிப்பிடத்தக்க உணர்வுபூர்வ தருணமாக இது அமைந்தது.

திரைப்படங்களைத் திரையிடுவதைக் கடந்தும், கலை, இசை மற்றும் திரைப்படத் துறைகளில் நீண்டகால பங்களிப்பை வழங்கியவர்களை அங்கீகரிக்கும் நோக்கத்தையும் இத்திரைப்பட விழா முன்னெடுத்து வருகிறது. அந்த வகையில், வைரமுத்து சொர்ணலிங்கம் அவர்களுக்கான இக்கௌரவிப்பு தமிழ்க் கனடிய கலைத்துறையின் நீண்டகாலப் பயணத்தில் ஒரு முக்கிய பதிவாக அமைந்துள்ளது.

திரைப்பட விழாவின் தலைவர் செந்தூரன் நடராஜா தலைமையிலும், விழா இயக்குநர் கிருத்திகா அவர்களின் ஒருங்கிணைப்பிலும் நடைபெற்ற இந்நிகழ்வில் சமூகத் தலைவர்கள், ஊடகப் பிரதிநிதிகள், அரசியல் பிரமுகர்கள் மற்றும் வர்த்தகத் துறையினர் உள்ளிட்ட பலர் கலந்துகொண்டனர்.

பல நாடுகள் மற்றும் மொழிகளைச் சேர்ந்த திரைப்படக் கலைஞர்கள் ஒன்றுகூடிய சர்வதேச மேடையில், தமிழ்க் கனடிய கலை மற்றும் இசைத்துறைக்கு 35 ஆண்டுகளாக வழங்கிய பங்களிப்புக்காக வைரமுத்து சொர்ணலிங்கம் கௌரவிக்கப்பட்டமை குறிப்பிடத்தக்கது.